DES MONCHAS D’MONTAGNÈ

Gn’a wére di tins, adons qui dj’èsteus su l’place du Forom, in automobilisse m’atauche èt  mi dmande :

-         Dijèz, Mossieur, dji seûs bé ci Montgnè-Tiyou ?

-         Non fét, m’garçon, vos ètèz ci à l’Noûville dins l’comune da Montgnè-sur-Sambe

-         Oyi mins Montgnè-Tiyou, c’èst p’tète djusse a costè ?

-         Wô non, m’fis ! D’in Montgnè a  l’aute, gn’a sakants kulomètes.

-         Comint c’èst-i posibe ?

-         Erwétèz come i faut su vos carte routière. Vos virèz bé.

-         Dj’é pièrdu m’carte routière

-         Ca c’èst malé ! Vos n’avèz qu’a dè rachtér ieune al librérie, d’roci, d’dsus l’cwin.

L’èst vré qu’dès Montgnès, Montigny, Montignies, gn’a dès monchas ré qu’en Wallonie. Vos avèz, par ègzimpe : Montigny-le-Tilleul, Montegnée, Montignies-sur-Roc, Montignies-Saint-Christophe, Montignies-lez-Lens, èt bé seûr Montignies-sur-Sambre. Dès Montgnè, parèt-i, gn’a co branmint d-z-autes en France.

Mins qw’ èst-ce qui ça vout dire « montigny » èt dispus quand qui l’egzisse li Montgnè da  nous-autes ?

Dès cés dijnut qui « montigny », ça vout dire « montagne  de feu » pasqui « ignis » dins l’parlâdje latin, c’èst du feu. Ça c’èst des  fôves di powètes. Montgnè, ça vout dire : « in endrwèt qu’èst muchi d’dzeus in grand tiène ». Gn’a y-ieût branmint dès fosses a Montgnè mins gn’a jamés y-ieût d’volcan !

Dispus quand qui l’egzisse ? Dispus dès sièkes èt des sièkes, parèt-i.

El pus vî des qwârtis, ça sreut l’Noûville. C’èst comike, hin, ène sakwè d’noû qui sreut pus  vî qu’èles-autes !

Gn’a fôrt longtins di d’ci, ène « vila » ç’èsteut ène grosse-grosse cinse amontchiye come ène fôrtèrèsse. Ele « vila », èle èsteut noûve … dins c’tins-la !

Pou comprînde èl retant dè m’istwère, faut qui dj’vos dije qui dji dmeure djustumint a l’Nouville.

Gn’a sakants djoûs di d’ci, dji fouyeut m’djârdin. Tout d’in côp, dji wès ène drole di ptite sakwè. Djè l’ramasse et dji l’mousse à m’feume in lyi djant :

-         A vos chèmanse, Neli, qw’èst c’qui c’èst qu’ça ?

Dji lyi done li p’tit machin ; t’ossi râde, èle si pète a  rire.

-    Hè bé, m’fi, vos d’alèz ièsse célèbe. On va scrîre di d’dins li rvûwe « Hainaut-Tourisme » : « Mossieur Rémond Bath, archéologue amateur, vient de  prouver la  haute antiquité de Montignies-sur-Sambre … in ramassant dins  s’jardin, a l’Nouville, li pus vî qwârti d’èle comune, … in bouton d’culote di saudârt romîn ! ».